Të gjithë hulumtuesit pjesëmarrës nga vende të ndryshme që lidhen me fushën e shëndetit mjedisor prezantuan përvojën e tyre shkencore në këtë konferencë, njëkohësisht për të njohur situatën e vendit tonë po edhe për të shkëmbyer përvoja me vende që kanë eksperienca shkencore të avancuara.
Zëvendës Rektorja për Shkencën dhe Projektet, Prof. Dr. Erinda Lika ishte një ndër drejtueset e sesionit “Prespektivat aktuale mbi cilësinë e ajrit dhe të ujit”, ndërsa prezantoi edhe përvojën e saj shkencore mbi rolin e ujërave të zeza si komponent kryesor i qëndrueshmërisë dhe përhapjes në gjenet e rezistencës antimikrobike që ndikojnë në cilësinë e shëndetit mjedisor në Shqipëri.
Po ashtu, Prof. Dr. Kapllan Sulaj ishte pjesë e sesionit “Cilësia e Ujit dhe mbrojtja detare” ku Rozarta Nezaj prezantoi punimin e saj lidhur me cilësinë e ujit të pijshëm, një vlerësim i klorit të mbetur dhe efekteve të tij shëndetësore.
Kjo është konferenca ndërkombëtare e dytë për shëndetin mjedisor, e organizuar nga Akademia e Shkencave e Shqipërisë në bashkëpunim me Universitetin George Mason, VA, SHBA, përfaqësuar nga Melissa Perry, Dekane e Shkollës së Shëndetit Publik në këtë universitet, por edhe profesorë e studentë të tij.
