Departamenti i Akuakulturës dhe Peshkimit (DAP) është krijuar me Vendimin Nr. 20 datë 15/07/2013 të Rektorit dhe miratimin e Senatit Akademik të Universitetit Bujqësor të Tiranës.  Megjithatë, diploma “Inxhinier Agrar” me profil “Akuakulturë dhe Menaxhim Peshkimi” është ofruar që nga viti akademik 2001-2002 nga Departamenti i Prodhimit Shtazor, fillimisht si diplomë e integruar e nivelit të dytë, dhe më pas si Diplomë e Ciklit të Parë (Bachelor) dhe e Ciklit të Dytë (Master Shkencor) të Studimeve.

Gjatë viteve të ofrimit të kësaj diplome, numri i të diplomuarve në fushën e akuakulturës dhe peshkimit ka qene i qëndrueshëm. Interesi për të ndjekur këtë drejtim studimi është nxitur kryesisht nga zhvillimi i shpejtë i sektorit të peshkimit dhe veçanërisht atij të akuakulturës, i cili duke ndjekur edhe tendencën botërore, është sektori i agrobiznesit me zhvillimin më të shpejtë në Shqipëri, por edhe shkenca e prodhimit te ushqimit me rritje me te shpejte ne botë. Kërkesa për specialistë është rritur edhe për shkak të detyrimit ligjor për punësimin e punonjësve të kualifikuar në fermat e akuakulturës, siç parashikohet në nenin 33 të Ligjit nr. 103/2016 “Për Akuakulturën”.

Në Shqipëri, Departamenti i Akuakulturës dhe Peshkimit në Fakultetin e Bujqësisë dhe Mjedisit mbetet e vetmja njësi që ofron formim të specializuar në këtë fushë. Programet e studimit që zhvillohen në Departamentin e Akuakulturës dhe Peshkimit  janë unike në sistemin universitar shqiptar dhe ofrojnë një kombinim të njohurive mbi akuakulturën dhe peshkimin. Këto programe ofrojnë një qasje ndërdisiplinore që mbulon teknologjitë e prodhimit, sigurinë ushqimore, shfrytëzimin e qëndrueshëm të burimeve ujore dhe menaxhimin e ndërmarrjeve të akuakulturës dhe peshkimit. Të diplomuarit pajisen me njohuri teorike dhe praktike të thelluara, të përshtatshme për sfidat aktuale të sektorit.