Departamenti i Gjuhëve të Huaja është pjesë përbërëse e Fakultetit të Ekonomisë dhe Agrobiznesit. Ky departament ofron rol mbështetës për të gjitha departamentet e fakulteteve të Universitetit Bujqësor të Tiranës nëpërmjet modulit të gjuhës angleze për qëllime specifike dhe atë të terminologjisë mjekësore (latinisht) në nivelin Bachelor. Prej disa vitesh departamenti i gjuhëve të huaja ofron për studentët e nivelit “Master i shkencave” gjuhën gjermane, frënge dhe italiane. Këto module synojnë ofrimin e kompetencave gjuhësore në aftësitë/shprehitë e dëgjimit, leximit, shkrimit dhe komunikimit.

Në kuadrin e thellimit të punës shkencore dhe bashkëpunimit, brenda Departamentit është krijuar Grupi Mësimor Kërkimor i Terminologjisë, i cili krahas mësimdhënies, ka si fokus kryesor punën me terminologjinë në fusha të ndryshme sipas programeve të pesë fakulteteve. Çdo fakultet i UBT-së ka tekstet specifike, si: anglishtja e bujqësisë & mjedisit; pylltarisë; mjekësisë veterinare; teknologjisë ushqimore; biznesit  dhe turizmit.

UBT shërben si qendër provimi për testin e gjuhës angleze APTIS, jo vetëm për studentët e UBT-së, por edhe jashtë saj. Ky test njihet zyrtarisht nga Ministria e Arsimit dhe Shkencës për çdo student që aplikon për master shkencor dhe doktoraturë. Aptis jep rezultate të sakta dhe të besueshme për nivelin e anglishtes dhe është i projektuar të vlerësojë katër disiplina: të folurit, shkrim, lexim dhe dëgjim.