Sektori i Programeve dhe Kurrikulave

Në përfundim të çdo viti akademik në të gjitha strukturat e UBT, realizohet proçesi i Analizës Mësimore i cili miratohet në Senatin Akademik të UBT. Bazuar në rezultetet e analizës merren vendimet dhe hartohet Plani i Veprimit për vitin e ardhshëm akademik.

Analiza e punës mësimore në tërësinë e saj orientohet drejt objektivave të mëposhtme:
  ·  Vlerësimi i veprimtarisë në punën mësimore në UBT gjatë vitit akademik, referuar detyrave të përcaktuara në Vendimin e Senatit gjatë analizës së vitit të kaluar akademik dhe Planit të Veprimit për vitin akademik,
 ·  Evidentimi i arritjeve në këtë drejtim me synim shtrirjen e tyre në nivel institucioni,
  · Evidentimi i problematikave dhe mundësitë për zgjidhje,
  · Vendosja e objektivave të reja dhe standardeve më cilësore të punës mësimore për vitin e ardhshëm akademik.

Raporti i Analizës Mësimore në UBT për çdo vit akademik bazohet në rezultatet e dala nga ky proçes në çdo GMK/njësi bazë si edhe Fakultete, në të dhëna të administruara dhe informacionin e ofruar nga Drejtoria e Shërbimeve Mësimore dhe Studentëve, të dhëna të marra nga Drejtoria e Burimeve Njerëzore dhe Shërbimeve Juridike, Biblioteka e Universitetit, FDE-ja, të dhëna nga njësitë e tjera ndihmëse, por më së shumti mbi treguesit sintetikë të elaboruar nga Drejtoria e Vlerësimit të Brendshëm dhe Sigurimit të Cilësisë.

Analiza e punës mësimore, gjithashtu mbështetet në ndryshimet që bëhen në kuadrin ligjor (Ligji Nr.80/2015, “Për Arsimin e Lartë dhe Kërkimin Shkencor në Institucionet e Arsimit të Lartë në Republikën e Shqipërisë”), kuadrin rregullativ dhe institucional në lidhje me Arsimin e Lartë në vend, si edhe në dokumentet kryesore të veprimtarisë së institucionit, si Statuti dhe Rregullorja e Studimeve Universitare të UBT.