Programet Bachelor – të rishikuara nën mbikëqyrje akademike nga Universiteti BOKU i Vjenës (Strategjia AUT 2030)
Shkenca Bujqësore dhe Siguri Ushqimi
Programi i Ciklit të Parë Bachelor në “Shkenca Bujqësore dhe Siguri Ushqimi” ofron pesë specializime në vitin e tretë: Agronomi, Hortikulturë, Mbrojtje Bimësh, Zootekni dhe Akuakulturë & Peshkim, dhe është ndërtuar në bashkëpunim me Universitetin BOKU për t’iu përgjigjur nevojave të tregut të punës. Ai siguron formim teorik dhe praktik në prodhimin bimor e shtazor, menaxhimin e fermave dhe akuakulturën, me fokus në përdorimin e teknologjive dhe metodave inovative për rritjen e produktivitetit dhe qëndrueshmërisë. Programi përgatit profesionistë të aftë për sektorin agro-ushqimor dhe institucionet publike, duke zhvilluar kompetenca analitike, teknike dhe menaxheriale për zhvillimin e qëndrueshëm të bujqësisë moderne.
Inxhinieri Mjedisi dhe Uji
Programi i Ciklit të Parë Bachelor në “Inxhinieri Mjedisi dhe Uji” ofron dy specializime në vitin e tretë: “Menaxhim uji” dhe “Menaxhim i burimeve natyrore”, dhe është i orientuar drejt adresimit të sfidave si ndryshimet klimatike, menaxhimi i ujit dhe mbrojtja e mjedisit. Programi është hartuar sipas standardeve akademike të Universitetit BOKU në Vjenë dhe ndërthur inxhinierinë me shkencat mjedisore dhe burimet natyrore për një formim bashkëkohor. Ai përgatit specialistë me kompetenca teorike dhe praktike në menaxhimin e ujërave, mbrojtjen e mjedisit dhe zhvillimin e qëndrueshëm, duke përfshirë projektimin e zgjidhjeve teknike, VNM/VNMS dhe zbatimin e legjislacionit mjedisor të BE-së.
Teknologji Informacioni në Bujqësi dhe Mjedis
Programi i Ciklit të Parë Bachelor në “Teknologji Informacioni në Bujqësi dhe Mjedis” është një program ndërdisiplinar modern që pajis studentët me aftësi teknike dhe praktike për të udhëhequr transformimin digjital në bujqësi dhe menaxhimin mjedisor. Ai është i orientuar drejt nevojave të transformimit digjital të bujqësisë shqiptare dhe integrimit në BE, në bashkëpunim me Universitetin BOKU, duke u fokusuar në programim, IoT, GIS dhe analizën e të dhënave. Programi përgatit specialistë për bujqësi të zgjuar dhe mbrojtjen e mjedisit, me kompetenca në menaxhimin e të dhënave, bujqësinë precize, GIS/teledeteksionin dhe automatizimin e proceseve vendimmarrëse.
Planifikim dhe Arkitekturë Peizazhi
Programi i Ciklit të Parë Bachelor në “Planifikim dhe Arkitekturë Peizazhi” formon profesionistë të aftë për të planifikuar, projektuar, menaxhuar dhe zhvilluar peizazhin në funksion të përmirësimit të cilësisë së jetës dhe mjedisit. Ai trajton territorin si një sistem ekologjik, social dhe estetik, duke iu përgjigjur sfidave të urbanizimit, ndryshimeve klimatike dhe nevojës për infrastrukturë të gjelbër. Programi përgatit studentë me kompetenca në analizën dhe planifikimin e peizazhit, përdorimin e mjeteve digjitale si GIS dhe CAD, si dhe menaxhimin e projekteve me përgjegjësi profesionale, etike dhe mjedisore.
Ekonomiks
Programi i Ciklit të Parë Bachelor në “Ekonomiks” ofron dy profile në vitin e tretë: “Ekonomi dhe Politika të Zhvillimit” dhe “Ekonomiksi i Aplikuar”, duke u orientuar drejt analizës ekonomike dhe zhvillimit të qëndrueshëm. Ai ka një qasje analitike që i përgjigjet nevojave të tregut në sektorët ekonomik, bujqësor, agroushqimor dhe zhvillimit rural, me fokus në ekonomi të aplikuar dhe politika zhvillimi. Programi përgatit studentë me kompetenca në analizën e tregjeve, vlerësimin e politikave publike dhe përdorimin e metodave sasiore e cilësore, duke i aftësuar për karrierë në sektorin publik, privat, OJQ dhe agjenci zhvillimore.
Menaxhim Biznesi
Programi i Ciklit të Parë Bachelor në “Menaxhim Biznesi” ofron dy profile në vitin e tretë: “Menaxhim Agribiznesi” dhe “Menaxhim i Turizmit Rural”, me fokus në sektorë strategjikë për zhvillimin ekonomik dhe rural. Ai është një program praktik, i realizuar në bashkëpunim me Universitetin BOKU, i orientuar drejt tregut të punës dhe i fokusuar në agrobiznes dhe turizëm rural si fusha me potencial të lartë punësimi. Programi përgatit studentë me kompetenca në menaxhim, marketing, financë dhe sipërmarrje, duke i aftësuar për drejtimin e bizneseve moderne dhe zinxhirëve të vlerës në sektorin agro-ushqimor dhe turistik.
Financë dhe Kontabilitet
Programi i Ciklit të Parë Bachelor në “Financë-Kontabilitet” formon profesionistë në fushën e financës dhe kontabilitetit për sektorin publik, privat dhe agrobiznesin, duke mbështetur vendimmarrjen ekonomike në sektorin bujqësor. Ai ofron formim teorik dhe praktik në financë, kontabilitet dhe menaxhim financiar në bashkëpunim me Universitetin BOKU, i përshtatur me kërkesat bashkëkohore të tregut të punës. Programi përgatit studentë me kompetenca në analizë financiare, raportim kontabël, menaxhim risku, buxhetim dhe vlerësim investimesh, duke i aftësuar për karrierë në institucione financiare, biznese dhe administratë publike.
Informatikë Biznesi
Programi i Ciklit të Parë Bachelor në “Informatikë Biznesi” ofron një formim të integruar në shkencat kompjuterike, administrimin e biznesit dhe ekonominë, me qëllim projektimin, zbatimin dhe menaxhimin e sistemeve të informacionit për organizata moderne. Ai zhvillohet në bashkëpunim me Universitetin BOKU dhe ofron formim teorik e praktik për ndërtimin dhe optimizimin e sistemeve të informacionit dhe komunikimit sipas standardeve europiane. Programi përgatit studentë me kompetenca në zhvillimin e sistemeve të menaxhimit të të dhënave, integrimin e teknologjive digjitale në biznes, menaxhimin financiar dhe ndërtimin e platformave inovative për ekonominë dhe agrobiznesin.
Teknologji Ushqimore
Programi i Ciklit të Parë Bachelor në “Teknologji Ushqimore” fokusohet në prodhimin, përpunimin dhe ruajtjen e ushqimeve, duke lidhur lëndët e para me teknologjinë dhe sigurinë ushqimore. Ai ofron mundësi karriere në industrinë ushqimore, laboratorë analitikë, kontroll cilësie dhe zhvillim produktesh, duke kombinuar teorinë me praktikën moderne në bashkëpunim me Universitetin BOKU. Programi përgatit studentë për të prodhuar ushqime të sigurta, cilësore dhe të qëndrueshme, me kompetenca në teknologjinë ushqimore, zbatimin e standardeve të sigurisë dhe cilësisë, si dhe aftësi për zgjidhje problemesh dhe punë në ekipe multidisiplinare.
Ushqimi dhe Shkencat e të Ushqyerit
Programi i Ciklit të Parë Bachelor në “Ushqimi dhe Shkencat e të Ushqyerit” fokusohet në ndikimin e ushqimit dhe stilit të jetesës në shëndetin e njeriut, duke trajtuar lidhjen mes zakoneve ushqimore dhe sëmundjeve kronike jo të transmetueshme. Ai ofron mundësi karriere në të ushqyerit, shëndetin publik, edukimin ushqimor dhe vlerësimin nutricional, në bashkëpunim me Universitetin BOKU dhe me qasje shkencore bashkëkohore. Programi përgatit studentë me kompetenca në analizën e sistemeve ushqimore, vlerësimin e cilësisë dhe sigurisë së ushqimeve, si dhe përdorimin e metodave kërkimore dhe biostatistikore për punë ndërdisiplinore dhe studime të avancuara.
Inxhinieri Pyjore
Programi i Ciklit të Parë Bachelor në “Inxhinieri Pyjore” ofron dy profile: “Menaxhim i ekosistemeve pyjore” dhe “Mbrojtja e natyrës dhe biodiversitetit”, duke kombinuar aftësi tekniko-profesionale dhe krijuese për menaxhimin e qëndrueshëm të pyjeve dhe kullotave. Ai siguron përvojë praktike në vlerësimin dhe qeverisjen e burimeve natyrore, me fokus në ruajtjen e ekosistemeve pyjore, biodiversitetit dhe përdorimin e teknologjive inovative. Programi përgatit specialistë për vlerësim dhe menaxhim të pyjeve, zbatim projektesh dhe aplikimin e parimeve të bioekonomisë pyjore në funksion të zhvillimit të qëndrueshëm.
Dizajni i Interierit dhe Inxhinieri Druri
Programi i Ciklit të Parë Bachelor në “Dizajni i Interierit dhe Inxhinieri Druri” ofron dy profile: “Inxhinieri teknologji druri” dhe “Dizajni i mobiljeve dhe interierit”, duke kombinuar aftësi teknike dhe krijuese për industrinë e drurit. Ai fokusohet në përgatitjen e studentëve për dizajn, përpunim dhe menaxhim të materialeve druri, me theks në qëndrueshmëri, zgjidhje ekologjike dhe përdorimin e teknologjive moderne. Programi përgatit profesionistë me kompetenca në teknologjitë e përpunimit të drurit, dizajnin estetik dhe funksional, njohjen e materialeve, si dhe menaxhimin e projekteve dhe punën në ekip në industrinë kreative dhe prodhuese.
Mjekësi Veterinare
Programi i Studimeve në “Mjekësi Veterinare” synon të formojë profesionistë të kualifikuar dhe të përkushtuar, të gatshëm të kontribuojnë në ruajtjen dhe përmirësimin e shëndetit të kafshëve, njerëzve dhe mjedisit. Ai ofron një formim të integruar teorik dhe praktik në partneritet me Universität für Bodenkultur Wien dhe Veterinärmedizinische Universität Wien, sipas standardeve europiane, duke ndërthurur teorinë me praktikën gjatë një programi 5.5-vjeçar. Programi përgatit mjekë veterinerë me kompetenca në diagnostikimin, trajtimin dhe parandalimin e sëmundjeve, si dhe në shëndetin publik, mirëqenien e kafshëve dhe sigurinë ushqimore përmes qasjeve klinike dhe epidemiologjike.