Departamenti i Gjuhëve të Huaja

Departamenti i Gjuhëve të Huaja, si pjesë përbërëse e Fakultetit të Ekonomisë dhe Agrobiznesit prej muajit shtator 2016, ofron rol mbështetës për të gjitha departamentet e fakulteteve të ndryshme të Universitetit Bujqësor të Tiranës (UBT). Ky departament ofron modulin e detyrueshëm të gjuhës angleze dhe atë të terminologjisë mjekësore (latinisht) në vitin e parë të studimeve të nivelit Bachelor. Moduli i gjuhës angleze, i ofruar në vitin e parë të Ciklit Bachelor në rang universiteti  me një total prej 60 orësh fizike i shtrirë në një vit akademik, me përjashtim të FMV ku moduli ofrohet gjatë semestrit të parë. Ky modul është i orientuar drejt kritereve të mësimit të Gjuhës Angleze për Qëllime Specifike (ESP), ndërsa terminologjia mjekësore e zhvilluar në semestrin e parë të vitit të parë me një total prej 30 orësh, ofrohet për studentët e Fakultetit të Mjekësisë Veterinare me synimin e vetëm që studentët e këtij moduli të njohin termat më të përdorshëm latin në anatominë dhe fiziologjinë e kafshëve, në shkrimin e recetave mjekësore dhe në rastet klinike.

Në kuadër të bashkëpunimit institucional me qendra të rëndësishme, që promovojnë gjuhën dhe kulturën e vendeve të ndryshme dhe më kryesorja në kuadër të bashkëpunimit institucional me universitete prestigjioze të ndryshme,  Departamenti i Gjuhëve të Huaja do të ofrojë për studentët e nivelit ‘Master Shkencor’ për vitin akademik 2021-2022 e në vazhdim gjuhën gjermane dhe atë franceze.  Moduli me përzgjedhje në këto dy gjuhë synon ofrimin e kompetencave gjuhësore për studentët e këtij cikli në aftësitë/shprehitë e dëgjimit, leximit, shkrimit dhe komunikimit, duke i përgatitur studentët për të menaxhuar komunikimin në këto gjuhë momentin që i bashkohen tregut të punës.

Falë kualifikimit dhe eksperiencës së stafit të DGJH janë mundësuar njohjet dhe aplikimi i qasjeve komunikuese në mësimdhënien e gjuhëve të huaja, veçanërisht në Anglishten për Qëllime Specifike (ang. ESP), zhvillimin dhe zbatimin e metodologjive të mësimdhënies të mundësuara nga teknologjitë si një mjet i domosdoshëm për përvetësimin e gjuhëve të huaja.

Me synim thellimin e punës shkencore brenda Departamentit është krijuar Grupi Mësimor Kërkimor (korrik 2021), i cili krahas mësimdhënies, do të ketë si fokus kryesor punën me terminologjinë në fusha të ndryshme të dijes e shkencës në përputhje me programet e 5 fakulteteve. Terminologjia është një fushë studimi e rëndësishme dhe e pashmangshme ne çdo fushë të dijes, sepse përfshin leksikun profesional te specialistëve/ekspertëve të fushave të ndryshme. Roli dhe përdorimi i saj është i dukshëm si bazë jo vetëm e komunikimit midis specialisteve, por njëkohësisht edhe një bazë për te njohur realitete te reja ne shkencë e teknikë. Puna kërkimore dhe shkencore e këtij GMK do të jetë e orientuar drejt bashkëpunimit me pedagogët dhe specialistët e UBT-së me synim jo vetëm njësimin, shqipërimin, normëzimin, unifikimin dhe standardizimin e termave në tekstet universitarë sipas specialiteteve dhe profileve të studimit,  por edhe në hartimin e fjalorëve dhe fjalorthëve terminologjik dy gjuhësh. Puna e specialistit dhe ekspertit të fushës është thelbësore në gjetjen e termit të duhur në shqip duke minimizuar futjen e huazimeve, ndërsa gjuhëtari do merret me veshjen gjuhësore të termit. Puna kërkimore në këtë drejtim ka kohë që ka nisur, ku pedagogët e këtij departamenti kanë botuar punime shkencore të shumta në fushën e terminologjisë. Kjo punë kërkimore është mishëruar edhe në hartimin e teksteve të specializuara në fushën e ESP-së.  Më konkretisht janë hartuar tekstet:

1- Anglishtja e Bujqësisë & Mjedisit;

2- Anglishtja e Pylltarisë;

3- Anglishtja e Mjekësisë Veterinare;

4- Anglishtja e Teknologjisë Ushqimore;

5- Anglishtja Ekonomisë, Biznesit &  Kontabilitetit;

6- Gjuhë Latine dhe Terminologji Mjekësore.

Pranë Departamentit të Gjuhëve të Huaja në ambientet e Fakultetit të Ekonomisë dhe Agrobiznesit është hapur “German Corner”, e cila do të vihet në shërbim të studentëve të kampusit universitar UBT, të cilët dëshirojnë të mësojnë gjuhën gjermane. Ky kënd u mundësua me mbështetjen e Goethe-Zentrum Tirana, pjesë e rrjetit ndërkombëtar të Instituteve Gëte dhe ka mision nxitjen dhe zhvillimin e bashkëpunimit gjuhësor dhe kulturor ndërmjet Gjermanisë dhe Shqipërisë.

Kjo qendër nuk do të ketë si qëllim vetëm zhvillimin e kursit të gjuhës gjermane, por do të shërbejë si një qendër, ku do të organizohen një sërë veprimtarish nga institucione të ndryshme, si një qendër ku studentët mund të informohen e të marrin të dhëna edhe për bursa studimi jashtë vendit.

Në ambientet e UBT-së është krijuar qendra e testimit të gjuhës angleze APTIS. Ky test është tashmë i mundur të kryhet jo vetëm për qindra studente/ë të UBT-së, por edhe për studentë të universiteteve të tjera që dëshirojnë të vazhdojnë studime të nivelit të dyta dhe të treta. Aptis jep rezultate të sakta dhe të besueshme për nivelin e anglishtes dhe teston aftësitë gramatikore, në fjalor dhe ato të gjuhës (të folurit, shkrim, lexim dhe dëgjim).