Gjatë një vizite akademike në Universitetin Bujqësor të Tiranës (UBT), profesori Johann Sockler nga Universiteti BOKU i Vjenës zhvilloi disa leksione me studentët e Departamentit të Shkencave Zooteknike dhe të Fakultetit të Mjekësisë Veterinare.
Leksionet u ndoqën me interes të veçantë nga studentët dhe trajtuan tema me rëndësi bashkëkohore në fushën e zooteknisë dhe përmirësimit gjenetik të kafshëve të fermës. Fokus i veçantë iu kushtua:
· Përdorimit të markuesve molekularë për studimin e diversitetit gjenetik, si brenda ashtu edhe midis popullatave të ndryshme të kafshëve bujqësore;
· Programeve racore të përmirësimit gjenetik, të cilat bazohen në përfshirjen aktive të komuniteteve të fermerëve dhe në zhvillimin e skemave të bërthamave racore.
Këto leksione kontribuuan në zgjerimin e njohurive shkencore të studentëve dhe krijuan një hapësirë të vlefshme për bashkëpunim ndërkombëtar në kërkim dhe edukim në fushën e zooteknisë dhe shkencave veterinare.
