Ambasadorja e Francës në Shqipëri viziton për herë të parë Universitetin Bujqësor të Tiranës
Rektori i Universitetit Bujqësor të Tiranës, Prof. Dr. Fatbardh Sallaku priti në një takim Ambasadoren e Francës në Shqipëri, SH. S. Znj. Catherine Suard dhe stafin e saj, Z. Pierre Raynaud (Këshilltar për Bashkëpunimin dhe Kulturën) dhe Z. Alexandre Martinez (Këshilltar Rajonal për Çështjet e Bujqësisë dhe Ushqimit).
Rektori Sallaku teksa e njohu Ambasadoren franceze me strukturat formuese të UBT dhe kapacitetet që ky institucion i arsimit të lartë bart në tërësinë e tij, e prezantoi edhe me objektivat dhe vizionin e UBT drejt zhvillimit të mëtejshëm të tre shtyllave bazë të funksionimit të tij, që janë mësimdhënia, kërkimi shkencor dhe transferimi i teknologjisë.
Po ashtu, Rektori theksoi se fokusi i UBT është që të ofrojë kontributin e tij në çdo cep të Shqipërisë, por dhe më gjerë, përmes njohurive, këshillimit dhe ekspertizës së stafit të tij, teknologjive inovatore apo studimeve kërkimore-shkencore, në funksion të zhvillimit të të gjitha nëndegëve të sektorit bujqësor.
Nga ana tjetër, Ambasadorja franceze përgëzoi stafin e UBT për gjithë frymën vizionare dhe qëllimin e të kthyerit në institucionin e parë të arsimit të lartë në vend të binjakëzuar me një ndër universitetet më të mira të profilit bujqësor në Europë.
Gjatë fjalës së saj, Ambasadorja sygjeroi nxitjen e akoma më shumë investimeve në fushën e bujqësisë dhe turizmit në vend pasi, sipas saj, ka shumë potencial që premton mundësi të larta zhvillimi.
